Dünya kinosunun əfsanəsinə çevrilmiş fransız aktyoru Jan-Pol Belmando vəfat edib. Karyerası boyu 100-ə yaxın filmdə çəkilən Belmando yaratdğı obrazlarla dünya kinosevərlərinin sonsuz rəğbətini qazanıb...
Uşaq yaşlarından heykəltəraş atası üçün modellik edən Jan Pol sonralar peşə seçimində xeyli çətinlik çəkir. Bir müddət dram dərnəklərində çıxış edən oğlan, həm də idmanla məşğul olurdu. Belə ki, 18 yaşında boks üzrə Paris çempionu adını qazanmışdı. Lakin Jan Polun son seçimi aktyorluq olur və o, ali təhsilini dram incəsənəti üzrə davam etdirir. Belmandonun kinoda debütü 1957-ci ilə təsadüf edir. Bu illərdə o, “Molyer” və “Gözəl qal və sus” filmlərində iştirak edir. Xüsusi üz cizgiləri, xarizması və istedadı sayəsidə ekranda göründüyü ilk andan tamaşaçının yaddaşına həkk olunan Jan-Pol Belmando bu xüsusiyyətlərdən ustalıqla istifadə edərək bir-birindən maraqlı rollar yaradır. 27 yaşlı Belmando rejissor Jan-Lük Qodarın “Son nəfəsdə” adlı ekran əsərində baş rolda çıxış edəndən sonra daha da tanınır. Çox keçmir ki, Qodarın “Dəlisov Pyero” filmində də çəkilir və canlandırdığı obrazla geniş tamaşaçı kütləsinin rəğbətini qazanır. XX əsrin ən məşhur fransız filmlərindən olan “Peşəkar”dakı rolunu uğurla ifa edən aktyor bütün təhlükəli tryuklarda özü iştirak edir. Rejissor Jorj Lotner film üçün xoşbəxt sonluq planlaşdırsa da, məhz Belmandonun istəyi ilə ekran əsəri faciəvi finalla bitir. Karyerasının ikinci hissəsində yüksək gəlirli işlərə üstünlük verən Jan Pol Belmando “Polis və cinayətkar”, “Çempionların çempionu” kimi filmlərə çəkilir. Fransız “yeni dalğa”sının görkəmli nümayəndəsi olan kino və teatr aktyoru müasiri Alen Delonla da tərəf müabili olub. Gənc və cazibədar aktyorların birlikdə iştirak etdiyi “Borsalino” filmi həm “Qızıl qlobus”, həm də “Qızıl ayı” mükafatlarına layiq görülüb. Kinematoqrafiyanın unudulmaz simaları dostluq münasibətlərini sonralar da davam etdiriblər. Jan Pol Belmandonun 88 yaşında vəfat etməsi xəbərini eşidən Alen Delon da bu itkidən dərindən sarsıldığını bildirib. Təkcə Fransız kinosunun deyil, dünya kinematoqrafiyasının görkəmli aktyoru Jan-Pol Belmando rejissor, aktyor, ssenari müəllifi kimi də mədəniyyətə bəxş etdiyi töhfələrlə daim xatırlanacaq...
Xavər Zairova